Saluton! Mi nomiĝas Adamo kaj loĝas en Krakovo, iama ĉefurbo de Pollando. Mi ŝatas naturon, antaŭ ĉio montaron kaj bestojn (birdojn) kaj aktivan ripozadon (marŝadon, vagadon, bicikladon, skiadon ktp). Kun granda plezuro mi vojaĝas, fotumas kaj ĝuas tempon kune kun homoj el diversaj landoj. Alia mia ŝatokupo estas lernado de lingvoj por efike komuniki kaj esplori lokajn temojn dum vojaĝoj.
Laŭ profesio mi estas informadikisto kaj nun laboras por vojaĝindustrio (aviadkompanioj). Mi estas membro de PEA kaj UEA. Foje mi kontribuas verkante tekstojn por E-gazetoj aŭ retradio aŭ kunorganizante aranĝojn. Mi ŝatus plibonigi mian lingvonivelon kaj se tempo permesos lerni ankoraŭ kelkajn aliajn lingvojn. De tempo al tempo mi partoprenas diversajn renkontiĝojn, kongresojn aŭ konferencojn pri lingvoj aŭ pri naturo. Ĉu vi ankaŭ interesiĝas pri tio kaj volas kune partopreni?
Mi ŝatas legi librojn, precipe beletron kaj fikcion, kiuj estis filmitaj, kaj kompari ilin kun ilia filmadapto. Malkovrado de la diferencoj inter la libro (origina versio de la verko) kaj la filmo estas tre interesa kaj foje amuza. Mi interesiĝas esence pri ĉiuj ĝenroj sed miaj plej ŝatataj estas vojaĝrakontoj, pskilologiaj romanoj, komedioj, krimromanoj kaj legendoj. Krom tio, foje mi legas librojn por esplori iun temon pli profunde. Ĝenerale mi ŝatas librojn kaj filmojn, kiuj havas interesan intrigon, tiajn, ke oni devas cerbumi por kompreni la situacion (ĉar ekzemple la agado estas komplika aŭ kaŝita en mistero, neprediktebla, tia ke la leganto aŭ la spektanto ne povas halti legante/rigardante ĝis la fino de la verko aŭ oni devas solvi iun enigmon). De tempo al tempo mi relegas kelkajn librojn, kiuj ekplaĉis al mi, ekzemple pro la mirindaj kaj amuzaj dialogoj (foje legante ilin dum vojaĝo per trajno mi hazarde ekridetas kio kaŭzas konsternon ĉe aliaj pasaĝeroj;-) Miaopinie gravas ankaŭ la filmmuziko ĉar ĝi kontrolas rapidecon de la agado kaj elvokas emociojn ĉe la spektanto.
Ligiloj